حچاية التنگال ٤٧

التفاصيل

تم إنشاءه بتاريخ السبت, 24 أيلول/سبتمبر 2016 06:29

كتب بواسطة: د.سعد العبيدي

                            د.سعد العبيدي

صاحبي هو إلي گال طرت من الفَرَحْ لمن قريت بالجريدة اليوم شركة شل العالمية راح تسوي مصنع بتروكيمياويات بالبصرة، لكن أشو گلبي لسبني وبطني لوتني لمنْ وصلت بقرايتي يم عبارة (أكبر مصنع بالمنطقهَ وَيّشَغِلْ شباب البصرة والمحافظات المجاورة).

واستمر بحچيه وگال وهو يضحك، گوه لزمت نفسي وعَلّمْا وصلت الخلخانه لني ميت، وبعد ما نفهتْ والحمد لله، عرفت ليش بطني خانتني وتبين لأن تذكرتْ معامل سووها أهل گبل وكل معمل يكملوه يخبصونه بالدعاية أكبر معمل بالعالم وأعظم انتاج بالمنطقة ويكفي الاستهلاك المحلي وكل الشرق، وتلگاه بعد فترة يطلع الحچي كله فالصوا والانتاج ما يكفي ربع المطلوب.
لا تدوخون عدنه هواي أمثله منها معمل الأسمدة بالبصرة، الى ماكو منه لا حس ولا خبر. ومعمل الورق بالدير، أكله الزنجار. ومعمل السكر بالعمارة، علواه لو ينتجنه قند. مصفى بيجي صفه خردة. ومعمل الحرير بالحلة، صار اسنين ما نتج طول قماش حتى لو بازه. مصانع السيارات بالاسكندرية، يكولون دا تصَنِعْ ستوتات لكنها تجميع وهم متكفي. ودبس كربلاء، باقي بس الاسمم. ومعامل البيرة فريدة وشهرزاد حرام واحد يحچي بيها وغيرها.
أگول لو نعوف المزامط ونمدد على گد اغطانهَ مو أحسن.
وحتى لا نِتْكَشَفْ والشتا جاي علواه لو نسوي معامل مال خيط ستلي، مخايط، مهافيف، مرازيب، تُنَگ، حصران، خصاف، إجلالات، دَعبُلْ ومن نكملها بخير وسلامه، وتبدي تنتج مضبوط، وتكفي حاجتنا إلها عود بزَوُدنا نگول هي الأكبر بالعالم، وراح تسد حاجة الشرق والغرب، وبذاك الوكت راح إنصدگ نفسنه، ونسكتْ، لأن محد بقى يستخدمها بالعالم غيرنا.