بغداديات ! زيارة شارل الحلو الى بغداد ١٩٦٧ !!! من ذكريات الابتدائية !!!!

                                                     

                        سيف الدين الألوسي

       

بغداديات ! زيارة شارل الحلو الى بغداد ١٩٦٧ !! من ذكريات الابتدائية !!

في ربيع سنة ١٩٦٧ وقبل امتحانات راس السنة ، وعندما كنت في الخامس ابتدائي زار الرئيس اللبناني المرحوم شارل الحلو مدينة بغداد ،، وفي زمن المرحوم الرئيس الطيب الذكر دوما عبد الرحمن عارف ، كنت في مدرسة المنصور التأسيسية في المنصور قرب معهد الفنون حاليا ،، وكانت مدرسة اهلية ابتدائية توسعت لاحقا الى روضة وثانوية ومن ثم تم تأميمها كلها وصارت مدارس حكومية سنة ١٩٧٥ !!!

نرجع الى سالفتنه ،، وحيث دخلت المرحومة صوفي مبارك الى صفنا الخامس A ,, وفي درس استاذ متي الله يرحمه ابو التاريخ اللي چنت مكفره وخليته يرتد عن الدين !!! ومن ورايه !!!! دخلت وقالت يله الصف كله يخرج وكل المدرسة لاستقبال الرئيس اللبناني عند مروره بالشارع المقابل للمدرسة !!
طبعا المرحومة صوفي مبارك كانت مديرة المدرسة وهي مربية فاضلة لبنانية ،، عاشت طيلة حياتها في بغداد وفي ستوديو صغير من استوديوهات نادي المنصور التسعة الملحقة بالنادي ،، وهي بيوت صغيرة جميلة مؤجرة تعطي واردا للنادي ايام الخير وهسه صارت سكن عوائل !!!!

المرحومة صوفي كانت اقل شدة ومحبوبة اكثر من مدام عادل الله يرحمها مدربة دوائر الامن على التعذيب !!!!!
صوفي مبارك كانت تتكلم مثل اللبنانيات هسه نص لبنيني ونص انكريزي !!! مثلا ، ابني كوم هير تعال لهون ،، بسرعة كويكللي سون !!!! وهلم جرا !!
المهم وزعولنه ورد لكل طالب وطالبة واني كالعادة وليتهم واخذت اربع وردات هديت ثلاثة لزميلاتي الطالبات الحلوات ،، ووحدة شمرتها على سيارة الرئيس !!!!
نزلت الطائرة الميدل ايست في المطار المدني ، المثنى لاحقا ، حزب الدعوة حاليا !!!! وكانت من نوع كراڤيل الفرنسية ام الحوادث الكثيرة !!! واستقبله الرئيس الراحل عارف وكل خمس دقايق تفوت طيارتين هوكر هنتر ناصية كانت مرافقة للضيف ،، وتهرجها للمدرسة !!
طلعونه بالنسق وبالمسير البطيئ الى شارع دمشق ! وحيث وقفت المدرسة على جانبي الطريق ( الزوراء كانت معسكر الوشاش وبابه النظام مقابل مدرسة الموسيقى وهسه بوابة الزوراء !! ) ،،،،، اتى موكب الرئيس البسيط تتقدمه سيارة شرطة نوع هولدن استرالية موديل ١٩٦٥لونها زيتوني !! ومن ثم راكبي الدراجات النارية وسيارة الرئيس الشوفرليت امبالا ١٩٦٥ بيضاء تنته !! وكان يستعملها المرحوم عبد السلام ايضا ،، والرئيسين الراحلين يسلمون على الزعاطيط والناس وهم واقفين بالسيارة ،، وبعدين راحوا ورجعوا مرة ثانية ووراهم اربعة سيارات شوفرليت موديلات ٦٦ و٦٤ لبقية الوفد والمستقبلين وبليه واق وويق ووخر من الشارع مثل فد ربع اليوم !!!! ،، المهم واحنه چنه نهتف للرئيس الحلو ،،على دلعونه وعلى دلعونه شارل الحلو يشبه البزونه !!!!!! ،، واستاذ متي يأشش بينه !! ،، وهو چان لابس قاط ابيض وخال قرنفلايه حمره بجيبه ،، شارل الحلو مو استاذ متي !!!! المهم بعد الاستقبال رجعنه للصفوف ورزلني استاذ متي ،، ولك اشون تهتف على دلعونه وعلى دلعونه ،، انت. ما مربى !!!! وطبعا غسلني بالتفال مالته لانه چان يرمي صلي من يحچي الله يرحمه !!!!!!!! جاوبته استاذ منو گالك اني مربى !!! اني ما مربى اني جبن !!!!!! وخليته يتخبل ،،. وگال اذا صاغ بغاسك خيغ اني كل شي ما كن افتهم !!!! الله يرحمك استاذ متي ويرحم الجميع ويرحم هذيج الايام الحلوة گبل منشوف الفايكنغ والهكسوس وحافات المياه !!!!!
محبتي للجميع وتأبرني لبنان شو مهضومه !!!!!!! أمييزنغ !!!

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

726 زائر، ولايوجد أعضاء داخل الموقع